ޕީއެންސީއަށް ސޮއިނުކޮށްގެން ސަފީރަކު ވަކިކުރިކަމަށް ފަތުރާ ހަބަރު ހަގީގަތާ ހިލާފު

ނޫހެއްގައި ޝާއިއުކޮށްފައިވާ، ޕީ.އެން.ސީ.އަށް ސޮއިނުކުރެއްވުމުން އެމްބެސެޑާ އެޓް ލާޖްގެ މަގާމުގައި ހުންނެވި އަހުމަދު ސަރީރު މަގާމުން ވަކިކުރެއްވި ކަމަށް ބުނާ ހަބަރަކީ ހަގީގަތާ ހިލާފު ހަބަރެއް ކަމަށް ހާރިޖީ ވުޒާރާއިން ހާމަކޮށްފިއެވެ.

ހާރިޖީ ވުޒާރާއިން ބުނެފައިވަނީ، ސަފީރުން މަގާމަށް އައްޔަނުކުރުމާއި މަގާމުން ވަކިކުރުމަކީ ދިވެހިރާއްޖޭގެ ފޮރިން ސާރވިސް ޤާނޫނުގެ ދަށުން، ވަކި އުސޫލުތަކެއްގެ މަތީން ހިނގަމުންދާ ކަމެއް ކަމަށެވެ. އެގޮތުން، ސަފީރުން ވަކިކުރުމުގެ ނިންމުންތައް ނިންމަވަނީ ރައީސުލްޖުމްހޫރިއްޔާއަށް ލިބިވަޑައިގަންނަވާ އިހްތިޔާރުގެ ދަށުންނެވެ.

އަދި ފޮރިން ސާރވިސްގެ މުވައްޒަފުންނަށް ފޮރިން ސާރވިސްގެ ކޯޑް އޮފް ކޮންޑަކްޓްގެ ދަށުން ސިޔާސީ ޕާޓީއެއްގެ މެންބަރެއްގެ ގޮތުގައި ނުހުރެވޭނެ ކަމަށް ހާރިޖީ ވުޒާރާއިން ބުނެއެވެ. އެހެންވެ ފޮރިން ސާރވިސްގެ މުވައްޒަފުން ގާނޫނާ ހިލާފަށް ސިޔާސީ ޕާޓީއަކަށް ސޮއިކުރުމަށް ސަރުކާރުން މަޖުބޫރެއް ނުކުރާނެ ކަމަށް ވެސް އެ ވުޒާރާއިން ބުނެއެވެ.