ހުޅުދުއްފާރުގައި ދަރިވަރުންގެ އެކޮމޮޑޭޝަން ފެސިލިޓީއެއް އަޅަން އެމްޓީސީސީއަށް
ރ. ހުޅުދުއްފާރުގައި މަތީ ތައުލީމު ހާސިލުކުރާ ދަރިވަރުންނަށް ހާއްސަ އެކަމަޑޭޝަން ފެސިލިޓީއެއް ގާއިމުކުރުމުގެ މަޝްރޫއު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ މިއަދު ހަވާލުކޮށްފިއެވެ.
މި މަޝްރޫއަކީ ޑިޒައިން އެންޑް ބިލްޑް އުސޫލުން ކުރިއަށް ގެންދާ މަޝްރޫއެކެވެ. މިކަމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ވިދާޅުވީ، މި މަޝްރޫއުގެ މައިގަނޑު މަގުސަދަކީ ދަރިވަރުންނަށް އަމިއްލަ ރަށުގައި ނުވަތަ ކައިރި ރަށެއްގައި ތިބެގެން ފެންވަރު ރަނގަޅު މަތީ ތައުލީމާއި ތަމްރީނު ހޯދުމުގެ ފުރުސަތު ފަހިކޮށްދިނުން ކަމަށެވެ.
މަތީ ތައުލީމާ ބެހޭ ވުޒާރާއިން މައުލޫމާތު ދިން ގޮތުގައި، ހުޅުދުއްފާރުގައި ބިނާކުރާ މި ފެސިލިޓީގައި ތަފާތު މޮޑެލްތަކުގެ އެކަމަޑޭޝަންތައް ހިމެނޭނެއެވެ. އޭގެ ތެރޭގައި:
- ދަރިވަރުންގެ އާއިލާތަކަށް އެކުގައި ތިބެވޭނެ ފަދަ 2 ކޮޓަރީގެ އަދި 3 ކޮޓަރީގެ އެޕާޓްމަންޓްތައް.
- ވަކިން ދިރިއުޅެން ބޭނުންވާ ދަރިވަރުންނަށް ޚާއްޞަ ސްޓޫޑިއޯ އެޕާޓްމަންޓްތައް ގާއިމުކުރާނެއެވެ.
މީގެ އިތުރުން، ކޮންމެ އެޕާޓްމަންޓެއްގައިވެސް ކެއްކުމާއި ލޯންޑްރީ ފަދަ އާންމު ދިރިއުޅުމަށް ބޭނުންވާ އަސާސީ ހުރިހާ ވަސީލަތްތަކެއް ގާއިމުކުރެވިފައި ހުންނާނެ ކަމަށް އެ ވުޒާރާއިން ބުނެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު އިތުރަށް ވިދާޅުވީ، މިއީ މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ސަރުކާރުން ކުރަމުންދާ މަސައްކަތަށް ލިބޭ ބޮޑު ކުރިއެރުމެއް ކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުގެ އަމާޒަކީ ކޮންމެ ކުއްޖަކަށްވެސް އެކުއްޖަކު ހުރި ރަށަކާ ވީހާވެސް ކައިރިން މަތީ ތައުލީމުގެ ފުރުސަތުތައް ފަހިކޮށްދިނުން ކަމަށްވެސް ވަޒީރު ފާހަގަކުރެއްވިއެވެ.
މިހާރު ރ. އަލިފުއްޓާއި ދުވާފަރުގައި ކުރިއަށްދާ މަޝްރޫއުތަކާއެކު، ހުޅުދުއްފާރުގެ މި މަޝްރޫއު ނިމުމުން ރ. އަތޮޅަކީ މަތީ ތައުލީމު ދިނުމުގައި ފާހަގަކޮށްލެވޭ މުހިންމު މަރުކަޒަކަށް ވެގެންދާނެ ކަމަށް ސަރުކާރުން އުންމީދު ކުރެއެވެ.
ކޮމެންޓު