ތެލުގެ ރިޒާވް ޤާއިމްކުރަން މާލެ ސަރަޙައްދުގެ ދެ ފަޅެއް ބަލަން ފަށައިފި

ރާއްޖޭގައި ދިގު މުއްދަތަކަށް ތެޔޮ ރައްކާކުރެވޭނެ އިންތިޒާމު ހަމަޖެއްސުމަށްޓަކައި، ތެލުގެ ރިޒާވް ޤާއިމްކުރުމަށް މާލެ ސަރަޙައްދުގެ ދެ ފަޅެއް ބަލަމުންދާ ކަމަށް މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ.

މެދުއިރުމަތީގެ ހަނގުރާމައާ ގުޅިގެން އެކުލަވާލާފައިވާ ކްރައިސިސް ކޮމިޓީގެ ފަރާތުން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޒަމީރު ވިދާޅުވީ، މި މަޝްރޫޢަކީ މާލީ ވުޒާރާއާއި އިޤްތިޞާދީ ވުޒާރާ އަދި އެސްޓީއޯ ގުޅިގެން ކުރިއަށްގެންދާ މުހިންމު މަސައްކަތެއް ކަމަށެވެ.

ވަޒީރު ޒަމީރު ވިދާޅުވީ، ތިން ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫޢުގެ ދަށުން މާލެ ސަރަޙައްދުން ބަލަމުންދާ ދެ ފަޅުގެ ސަރވޭގެ މަސައްކަތްތައް އަންނަ ހަފުތާގައި ފެށޭނެ ކަމަށެވެ.

މީގެ އިތުރުން ވަޒީރު ފާހަގަކުރެއްވި ގޮތުގައި، އިންޑިއާ ކަނޑަކީ ތެލުގެ ވިޔަފާރި ފުޅާދާއިރާއެއްގައި ހިނގާ ސަރަޙައްދަކަށްވުމުން، ރާއްޖެއަށް ބޭނުންވާ މިންވަރު ރައްކާކުރުމަށްފަހު އިތުރުވާ ޖާގަ ބޭރުގެ ކުންފުނިތަކަށް ކުއްޔަށް ދޫކުރުމުގެ ފުރުޞަތުވެސް އޮންނާނެއެވެ. މި މަޝްރޫޢުގެ ފުރަތަމަ ފިޔަވަޅުގެ މަސައްކަތް ދެ އަހަރު ތެރޭގައި ނިންމާލުމަށް އަމާޒު ހިފާފައިވާއިރު، މުޅި މަޝްރޫޢު ނިންމުމަށް ކަނޑައަޅާފައިވަނީ ފަސް އަހަރު ދުވަހުގެ މުއްދަތެކެވެ.

މިހާރު ރާއްޖެއަށް ބޭނުންވާ ތެޔޮ ރައްކާކުރަނީ މާލެ ކައިރީގައި އޮންނަ ފުނަދޫގައެވެ. އެތަނުގެ ކެޕޭސިޓީއަކީ 291,000 ފީފާގެ ޑީސަލާއި 59,000 ފީފާގެ ޕެޓްރޯލެވެ. ނަމަވެސް އައު ރިޒާވްއާއެކު ރާއްޖޭގެ ތެލުގެ ރައްކާތެރިކަން މިހާރަށްވުރެ އެތައް ގުނައެއް ވަރުގަދަވެގެންދާނެ ކަމަށް ސަރުކާރުން ބުނެއެވެ.