ސުޕްރީމް ކޯޓުގެ ނިންމުމަށް ސުއޫދު ފާޑުވިދާޅުވުމުން، މުހުތާޒުގެ ރައްދެއް
ރައްޔިތުންގެ މަޖިލީހުގެ ދައުރު ކުރުކޮށް، ރިޔާސީ އިންތިހާބާއި މަޖިލިސް އިންތިހާބު އެކުގައި ބާއްވާ ގޮތަށް ގާނޫނުއަސާސީއަށް ގެނައި އިސްލާހު ބާތިލްކުރުމަށް ހުށަހެޅި މައްސަލަ ސުޕްރީމް ކޯޓުން ބަލައިނުގަތުމަށް ނިންމި ނިންމުމާ ގުޅިގެން، އެ ކޯޓުގެ ކުރީގެ ފަނޑިޔާރު ހުސްނުއްސުއޫދު ފާޑުވިދާޅުވުމުން، ފޮރިން މިނިސްޓްރީގެ ސްޓޭޓް މިނިސްޓަރު މުހުތާޒް މުހުސިން ފާޑުވިދާޅުވެއްޖެއެވެ.
މި މައްސަލައަކީ ގާނޫނީ ވަކީލު އަދި ރައްޔިތުންގެ މަޖިލީހުގެ ކުރީގެ މެންބަރު އަލީ ހުސައިން ސުޕްރީމް ކޯޓަށް ހުށަހެޅުއްވި މައްސަލައެކެވެ. ނަމަވެސް، ސުޕްރީމް ކޯޓުގެ ރަޖިސްޓްރާ ވަނީ އެ މައްސަލަ ބަލައިނުގަތުމަށް މިއަދު ނިންމަވާފައެވެ.
މި ނިންމުމާ ގުޅިގެން ކަންބޮޑުވުން ފާޅުކުރައްވައި ކުރީގެ ފަނޑިޔާރު ހުސްނުއްސުއޫދު އެކްސްގައި ކުރެއްވި ޕޯސްޓެއްގައި ވިދާޅުވީ، ރިފަރެންޑަމްއަކަށް އަހަންޖެހޭ ކަމެއްގައި 15 ދުވަސް ތެރޭގައި ބިލާމެދު ގޮތެއް ނުނިންމުމުން ބިލު ބާތިލުވާނެ ކަމަށް ބުނެ ހުށަހެޅި މައްސަލައިގައި، އަޑުއެހުމެއް ވެސް ނުބާއްވައި ނިޔާ ކަނޑައެޅުމަކީ ބޮޑު ގޯހެއް ކަމަށެވެ.
ސުޕްރީމް ކޯޓުގެ މި ނިންމުމަށް ފާޑުވިދާޅުވަމުން ސުއޫދު އިތުރަށް ވިދާޅުވީ، ދައުވާ ކުރާ މީހާގެ ވާހަކަ އަޑުއެހުމެއް ނެތި ނިޔާ ކަނޑައެޅުމަކީ އިންސާފުގެ ހަމަތަކާ ޚިލާފު ކަމެއް ކަމަށެވެ.
ސުއޫދުގެ މި ވާހަކަތަކަށް ރައްދު ދެއްވަމުން ފޮރިން މިނިސްޓްރީގެ ސްޓޭޓް މިނިސްޓަރު މުހުތާޒް މުހުސިން ވިދާޅުވީ، ރަޖިސްޓްރާ މެދުވެރިކޮށް އެންމެ ގިނައިން ގޮތް ނިންމާފައިވަނީ ސުއޫދު ސުޕްރީމް ކޯޓުގެ ފަނޑިޔާރުކަމުގައި ހުންނެވި ދުވަސްވަރު ކަމަށެވެ. އަދި ރަޖިސްޓްރާއަށް އެ ބާރު ދިނީވެސް އޭރުގެ ސުޕްރީމް ކޯޓުންކަން މުހުތާޒް ފާހަގަކުރެއްވިއެވެ.
“ތިޔަ ވިދާޅުވާގޮތަށް ރަޖިސްޓްރާ މެދުވެރިކޮށް އެންމެ ގިނައިން ގޮތް ނިންމާފައިވަނީ އުސްތާޛު ސުއޫދު ސްޕްރީމް ކޯޓުގެ ފަނޑިޔާރުކަމުގައި ހުންނެވިއިރު. އަދި ރަޖިސްޓްރާއަށް އެބާރު ދިނީވެސް އޭރުގެ ސްޕްރީމްކޯޓުން. ރަޖިސްޓްރާގެ އެފަދަ ނިންމުންތައް ރަނގަޅުކަމަށް ކަނޑައަޅާފައިވާ ފަނޑިޔާރުންގެ ތެރޭގައި އުސްތާޛު ސުއޫދު ހިމެނޭ.” މުހުތާޒު ވިދާޅުވިއެވެ.
މުހުތާޒް އިތުރަށް ވިދާޅުވީ، ރަޖިސްޓްރާގެ އެފަދަ ނިންމުންތައް ރަނގަޅު ކަމަށް ކަނޑައަޅާފައިވާ ފަނޑިޔާރުންގެ ތެރޭގައި ވެސް ސުއޫދު ހިމެނިވަޑައިގަންނަވާ ކަމަށެވެ.
މި މައްސަލައަކީ ގާނޫނުއަސާސީއަށް ގެނައި އިސްލާހެއްގެ ސަބަބުން ރައްޔިތުންގެ މަޖިލީހުގެ ދައުރު ކުރުވެ، އިންތިހާބުތައް އެކުގައި ބޭއްވުމަށް ނިންމި ނިންމުމާ ގުޅިގެން އުފެދިފައިވާ ގާނޫނީ ބަހުސެކެވެ. ސުޕްރީމް ކޯޓުން މި މައްސަލަ ބަލައިނުގަތުމަށް ނިންމީ ކޯޓަށް ހުށަހެޅޭ މައްސަލަތައް ބަލައިގަތުމާ މެދު ރަޖިސްޓްރާ ނިންމަވާ ނިންމެވުމެއްގެ ތެރެއިންނެވެ.
ކޮމެންޓު