މާފުއްޓާއި އެރަށު ހިއްކި ސަރަހައްދު ގުޅުވައިދޭ ބުރިޖުގެ އަމަލީ މަސައްކަތް ފަށައިފި

ކ.މާފުއްޓާއި އެރަށު ހިއްކި ސަރަހައްދު ގުޅުވައިދޭ ބުރިޖުގެ އަމަލީ މަސައްކަތް ފަށައިފި އެވެ.

މި މަޝްރޫއު ފެށުމުގެ ގޮތުން އެރަށުގައި ވަނީ ހާއްސަ ހަފްލާއެއް ބާއްވާފަ އެވެ. މި ހަފްލާގައި ރައްޔިތުންގެ މަޖިލީހުގެ މާފުށި ދާއިރާގެ މެންބަރު ހުސެއިން ރިޒާ އާދަމް އަދި ހައުސިން މިނިސްޓްރީގެ ސްޓޭޓް މިނިސްޓަރު އިސްމާއީލް ހަމީދުގެ އިތުރުން، އެމްޓީސީސީގެ ޑެޕުޓީ މެނޭޖިން ޑައިރެކްޓަރު މުހައްމަދު ޖަމްޝީދު ބައިވެރިވެވަޑައިގަނެފައިވެއެވެ.

ހިއްކައިފައިވާ ސަރަހައްދުން ބޯހިޔާވެހިކަމާއ،ި ސިނާއީ، ބޭނުންތަކަށާއ،ި ވިޔަފާރި ބޭނުންތަކަށް ބިން ދޫކުރެވޭ އިރު، މިއެޅޭ ބުރިޖާއިއެކު ރަށުގެ އުމުރާނީ ތަރައްގީ އާއި އިގްތިސާދީ ދުވެލި އިތުރަށް ހަލުވިވެ، މިހާރަށްވުރެވެސް ރަށުގައި ފަތުރުވެރިކަމުގެ ވިޔަފާރި ކުރިއަރައިގެންދިއުމަށް މަގުފަހިވެގެންދާނެކަމަށް ވެސް އެމްޓީސީސީން ބުނެފައިވެއެވެ.

މި މަޝްރޫއުގެ ދަށުން މާފުއްޓާއި އެރަށުގައި ހިއްކި ސަރަހައްދު ގުޅާލުމަށް ހަމަޖެހިފައިވަނީ 137 މީޓަރުގެ ބްރިޖަކުންނެވެ. އަދި މި މަޝްރޫއުގެ އަގަކީ، 35.42 މިލިއަން ރުފިޔާއެވެ. މި މަސައްކަތް އެމްޓީސީސީން އެއް އަހަރުތެރޭގައި ނިއްމުމަށް ވަނީ ހަމަޖެހިފައެވެ.