ސުކޫކު ދެއްކީ، ހަރު މުދަލެއް ނުވިއްކައި، އަމިއްލަ ބާރުވެރިކަމުގައި: ރައީސް

ކުރީގެ ސަރުކާރުން ނަގާފައިވާ ބޮޑު ދަރަންޏެއް ކަމަށްވާ 524.68 މިލިއަން އެމެރިކާ ޑޮލަރު (ގާތްގަނޑަކަށް 8 ބިލިއަން ރުފިޔާ) ގެ ސުކޫކު، ރާއްޖޭގެ އެއްވެސް ހަރުމުދަލެއް ނުވިއްކައި، މި ސަރުކާރުގެ އަމިއްލަ ބާރުވެރިކަމުގައި ދައްކައި ހަލާސްކޮށްފި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މި މަހުގެ 4 ވަނަ ދުވަހު ބޭއްވި ކައުންސިލްތަކުގެ ބައި-އިލެކްޝަންގައި އއ. އަތޮޅުގެ ތިން ރަށަކުން ޕީއެންސީއަށް ލިބުނު ކާމިޔާބީ ފާހަގަކުރުމަށް ރަސްދޫގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މިއީ 2021 ވަނަ އަހަރު ކުރީގެ ސަރުކާރުން ނަގާފައިވާ ދަރަންޏެއް ކަމަށެވެ. އަދި މި ފައިސާ ދެއްކުމަށް މި ސަރުކާރުން އެންމެ ބޮޑު އިސްކަމެއް ދިނީ ގައުމު ބަނގުރޫޓުވިޔަ ނުދިނުމަށްޓަކައި ކަމަށް އެމަނިކުފާނު ފާހަގަކުރެއްވިއެވެ.

• ދަރުމަވަންތަ ހޮސްޕިޓަލް
• ފިނޭންސް މިނިސްޓްރީގެ އިމާރާތް
• އިސްކަންދަރު ސްކޫލް ހުރި ބިން
• އައިޖީއެމްއެޗް ހުރި ބިން

އެމަނިކުފާނު އިތުރަށް ވިދާޅުވީ، ސުކޫކު ނުދެއްކުނު ނަމަ މި ހަރުމުދާ ދައުލަތަށް ގެއްލިގެން ދިޔުމުގެ ބިރު އޮތް ކަމަށެވެ.

އިދިކޮޅު ފަރާތްތަކުން މި ފައިސާ ނުދައްކާ ކަމަށް ބުނެ ދައްކާ ވާހަކަތަކަށް ރައްދު ދެއްވަމުން ރައީސް ވިދާޅުވީ، ފައިސާ ދެއްކިކަމުގެ ހެކި އެމްއެމްއޭ އާއި ފިނޭންސް މިނިސްޓްރީގެ އިތުރުން ބައިނަލްއަގުވާމީ މާލީ އިދާރާތަކުން ފެންނަން ހުންނާނެ ކަމަށެވެ.

މީގެ އިތުރުން، ކުރީގެ ސަރުކާރުން ބައެއް ތަންތަން ރަހުނުކޮށްފައި ނަގާފައިވާ އިތުރު ލޯކަލް ސުކޫކުތައް ވެސް އެބަހުރި ކަމަށާއި، އެ ތަންތަން ސަލާމަތް ކުރުމުގެ މަސައްކަތް ވެސް ސަރުކާރުން ކުރިއަށް ގެންދަވާނެ ކަމުގެ ޔަގީންކަން ރައީސް ދެއްވިއެވެ. ގައުމުގެ އިގްތިސާދު ހަމަ މަގަށް އެޅުވުމަށާއި، ދަރަނިތައް އަދާކުރުމަށް ސަރުކާރުން މެދުނުކެނޑި މަސައްކަތް ކުރަމުންދާ ކަމަށްވެސް އެމަނިކުފާނު ވިދާޅުވިއެވެ.