ދެމެހެއްޓެނިވި ފަތުރުވެރިކަން ކުރިއެރުވުމަށް ގުޅިގެން މަސައްކަތްކުރަންޖެހޭ: ތާރިގް

ދެމެހެއްޓެނިވި ފަތުރުވެރިކަން ކުރިއެރުވުމަށް އެންމެން ގުޅިގެން މަސައްކަތްކުރުމަށް ޓޫރިޒަމް މިިނިސްޓަރު ތާރިގް އިބްރާހީމް ގޮވާލައްވައިފިއެވެ.

މިނިސްޓަރު ތާރިގް މިކަމަށް ގޮވާލެއްވީ މިއަދު ފާހަގަކުރަމުންދާ ދުނިޔޭގެ ފަތުރުވެރިކަމުގެ ދުވަހާއި ގުޅިގެން ފޮނުއްވި ވީޑިއޯ މެސެޖެއްގައެވެ.

ތާރިގް ވިދާޅުވީ، ފަތުރުވެރިކަމުގެ ދާއިރާއިން ލިބޭ ފައިދާ އެންމެންނަށް ލިބިގެންދާނެކަން ކަށަވަރުކުރުމަށާއި، ފަތުރުވެރިކަމުގެ ސިނާއާތަކީ ދެމެހެއްޓެނިވި އަދި ހަރުދަނާ ސިނާއަތަކަށް ހެދުމަށްޓަކައި އެންމެން ގުޅިގެން މަސައްކަތްކުރަންޖެހޭކަމަށެވެ. އެކަމަށްޓަކައި ދައުލަތާއި، އަމިއްލަ ކުންފުނިތަކާއި، ރައްޔިތުންގެ ބައިވެރިވުން ވަރަށް ބޮޑަށް ބޭނުންވާކަމަށާއި، ދެމެހެއްޓެނިވި ގޮތަކަށް ފަތުރުވެރިކަން ކުރިއެރުވުމަކީ ރާއްޖޭގެ އާދަކާދަތަކާއި ތިމާވެށި ހިމާޔަތްކުރުމަށްވެސް މަގުފަހިކޮށްދޭނެ ކަމެއްކަމަށް ތާރިގް ވިދާޅުވިއެވެ.

ބައިނަލްއަގުވާމީ ތަފާސްހިސާބުތައް ދައްކާގޮތުގައި މިދިޔަ އަހަރު ދުނިޔޭގެ ފަތުރުވެރިކަމުގެ ދާއިރާ 1.6 ޓްރިލިއަން އެމެރިކާ ޑޮލަރަށް އަރާފައިވާއިރު މިއަހަރު އެކި ހައުމުތަކަށް ދަތުރުކުރާ ފަތުރުވެރިންގެ އަދަދު މިދިޔަ އަހަރާ އަޅާބަލާއިރު މިއަހަރު 3-5 އިންސައްތަ އިތުރުވާނެ ކަމަށް ލަފާ ކުރާ ކަމަށްވެސް މިނިސްޓަރު ވިދާޅުވިއެވެ. ތާރިގް ވިދާޅުވީ، މި ކުރިއެރުން މިއަދު ރާއްޖެއިންވެސް ފެންނަމުންދާ ކަމަށާއި ފާއިތުވި އަހަރުތަކުގައި ރާއްޖޭން ފަތުރުވެރިކަމުގެ ދާއިރާ ކުރިއެރުވުމާއެކު ވެށި ހިމާޔަތްކުރުމަށް ގިނަ މަސައްކަތްތަކެއް ކޮށްފައިވާކަމަށެވެ.