3 ޤައުމެއްގެ އައު ސަފީރުން ރައީސަށް ފަތްކޮޅު އަރުވައިފި

ދިވެހިރާއްޖެއަށް ކަނޑައަޅާފައިވާ ބައެއް ޤައުމުތަކުގެ އައު ސަފީރުން، އެބޭފުޅުންގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއަށް އަރުއްވައިފިއެވެ.

ރައީސް އޮފީހުގައި ވަކިވަކިން ބޭއްވުނު ޚާއްޞަ ރަސްމިއްޔާތުތަކެއްގައި ފަތްކޮޅު އަރުވާފައިވަނީ ނެދަލޭންޑްސް، ފްރާންސް (ފަރަންސޭސިވިލާތް) އަދި ފިލިޕީންސްގެ އައު ސަފީރުންނެވެ.

ނެދަލޭންޑްސްގެ އައު ސަފީރު، ހިޒް އެކްސަލަންސީ ވެއިބެ ޖޭކޮބް ޑި ބޮއަރއާއެކު ބޭއްވެވި ބައްދަލުކުރެއްވުމުގައި، ދެޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ބެހޭގޮތުން ވާހަކަދެކެވުނުއިރު، ޚާއްޞަކޮށް އުމްރާނީ ތަރައްޤީއާއި، މޫސުމީ ބަދަލުތަކަށް ހޭނުމުގެ ދާއިރާއިން ގުޅުން ބަދަހިކުރުމާ ގުޅޭގޮތުން ފުޅާދާއިރާއެއްގައި މަޝްވަރާކުރެއްވިއެވެ.

ފްރާންސްގެ އައު ސަފީރު، ހިޒް އެކްސަލަންސީ ރޭމީ ލަންބާޓާއެކު ބޭއްވި ބައްދަލުވުމުގައި، ފަތުރުވެރިކަމުގެ ދާއިރާއާއި، ކަނޑުގެ ރައްކާތެރިކަމާއި، މޫސުމީ ބަދަލުތަކުން ތިމާވެށި ޙިމާޔަތްކުރުމުގެ އިތުރުން ސަރަޙައްދީ ސަލާމަތާއި ހަމަޖެހުމާ ގުޅޭގޮތުން ދެބޭފުޅުން ޚިޔާލު ބަދަލުކުރެއްވި ކަމަށް ރައީސް އޮފީހުން ހާމަކުރެއެވެ.

މީގެއިތުރުން، ފިލިޕީންސްގެ އައު ސަފީރު، ހަރ އެކްސަލަންސީ ނީނާ ޕީ. ކެއިންގްލެޓާއެކު ބޭއްވި ރަސްމީ ބައްދަލުވުމުގައި، ދެޤައުމުގެ ދެމެދުގައި އޮތް އިޤްތިޞާދީ އަދި ބައިނަލްއަޤްވާމީ ގުޅުންތައް އާ ހިސާބަކަށް ގެންދިއުމަށްޓަކައި، އިޤްތިޞާދީ ބައިވެރިވުން އިތުރުކުރުމާއި ދެޤައުމަށް ފައިދާހުރި ދާއިރާތަކުން ގުޅިގެން މަސައްކަތް ކުރުމަށް ފުޅާދާއިރާއެއްގައި މަޝްވަރާކުރައްވާފައިވާ ކަަމަށް ރައީސް އޮފީހުން މައުލޫމާތު ދިނެވެ.

މި ރަސްމިއްޔާތަށް ސަފީރުން ވަޑައިގެންނެވީ ހަތްކޮޅުގައި ރަސްމީ ޢިއްޒަތުގައި، މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)ގެ ބެރު ދުންމާރި ތާޅަފިލީގައި، ހެވިކަމުގެ ލަޝްކަރާއެކު ހިންގަވާފައެވެ.