ގެދޮރު އިމާރާތް ކުރަން ލޯނު ލިބޭނެ ފަސޭހަ އިންތިޒާމްތަކެއް ހަމަޖައްސަނީ!

ގެދޮރު އިމާރާތް ކުރުމަށް ބޭންކުތަކުން ދޫކުރާ ލޯނުތައް ފަސޭހައިން ލިބޭނެ އިންތިޒާމްތަކާއި ލޯނުގެ އިކުއިޓީ ޕޭމަންޓަށް އެހީތެރިވެދޭނެ ހާއްސަ ސިސްޓަމެއް ގާއިމުކުރުމަށް ސަރުކާރުން މަސައްކަތް ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ

ރާއްޖޭގައި ގެދޮރު ބިނާކުރުމަށާއި ފްލެޓްތަކަށް ފައިސާ ދެއްކުމަށް ބޭންކުތަކުން ލޯނު ނަގާއިރު، ޑައުންޕޭމަންޓް ނުވަތަ އިކުއިޓީގެ ގޮތުގައި ބޮޑު އަދަދެއް އަމިއްލައަށް ދައްކަންޖެހުމަކީ އާންމުންނަށް އަބަދުވެސް ކުރިމަތިވާ އެންމެ ބޮޑު އެއް ގޮންޖެހުމެވެ. މި މައްސަލައަށް ހައްލެއް ހޯދައިދިނުމުގެ ގޮތުން، ގެދޮރުވެރިކަމަށް ހާއްސަކޮށްގެން، 5 އިންސައްތައަށްވުރެ އިންޓްރެސްޓް މަތިނުވާނެހެން ހައުސިންގ ލޯނުތަކެއް ތައާރަފްކުރުމަކީ ރައީސް ޑރ. މުހައްމަދު މުއިއްޒުގެ ސަރުކާރުގެ މުހިންމު ވައުދެކެވެ.