ވަޒީފާގެ ބާޒާރު ހަރުދަނާކުރުމަށް “މައި ކެރިއަރ ޕޯޓަލް” އިފްތިތާޙުކޮށްފި

ރާއްޖޭގެ ވަޒީފާގެ ބާޒާރު ހަރުދަނާކޮށް ޒަމާނީކުރުމަށް ނޭޝަނަލް ކެރިއަރ ސަރވިސްއިން  “މައި ކެރިއަރ ޕޯޓަލް” އިފްތިތާޙުކޮށްފިއެވެ.

މި ޕޯޓަލް ރަސްމީކޮށް އިފްތިތާޙުކޮށްދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާންއެވެ. މިއީ ރާއްޖޭގެ ވަޒީފާގެ ބާޒާރުގެ ކަންކަމާއި، މުވައްޒަފުން ހޯދުމުގެ ނިޒާމުގެ އިތުރުން ކެރިއަރ ޑިވެލޮޕްމަންޓްގެ ޚިދުމަތްތައް އެއް ފުރާޅެއްގެ ދަށުން ފަސޭހަކަމާއެކު ފޯރުކޮށްދިނުމަށް ޚާއްޞަކޮށް ފަރުމާކޮށްފައިވާ ޒަމާނީ ޕްލެޓްފޯމެކެވެ.

މައި ކެރިއަރ ޕޯޓަލް މެދުވެރިކޮށް ކެރިއަރ ގައިޑަންސް، ޕާތުވޭ ޑިޒައިނަރ، މައިލްސްޓޯން ޓްރެކަރ، އަދި ވަޒީފާއާ ގުޅުވައިދިނުމުގެ ހިދުމަތްތައް ލިބިގެންދެއެވެ. މި ޕޯޓަލްއިން ތަމްރީނުލިބިފައިވާ ކައުންސިލަރުންގެ އެހީތެރިކަމާއި، ވަޒީފާގެ ފުރުސަތުތަކާއި، އަދި ކެރިއަރ ޕްލޭންތައް ބަލަހައްޓައިދެއެވެ.