ބައެއް ކެރިއަރތައް ފެށެނީ ވަރުގަދަ އަޒުމަކާއެކުއެވެ. ނަމަވެސް އަނެއްބައި ކެރިއަރތަކަކީ ހަމަ އިއްތިފާޤަކުން ފެށި، ފަހުންދިރިއުޅުމުގެ މުހިންމު ބައަކަށް ބަދަލުވާ ކަންކަމެވެ. މާލެ ނޯތް ހާބަރުގެ އޮޕަރޭޝަންސް ޔުނިޓްގެ ހެޑްގެ މަގާމުގައި މިހާރުމަސައްކަތް ކުރަމުންގެންދާ ޖިޔާމް ސައީދުގެ ކެރިއަރު ފެށިފައިވަނީ ވަޒީފާގެ އާދައިގެ އިއުލާނަކުންނެވެ. ނޯތު ހާބަރު އަލަށް ތަރައްގީކޮށް، އެތަން ހިންގުމަށް މުވައްޒަފުން ހޯދަން އުޅުނުއިރު، އޭނާ އެ މަގާމަށް އެދި ހުށަހެޅީ މި ނިންމުމަކީ އޭނާގެދިރިއުޅުމާއި ހިޔާލުތައް ބައްޓަންކޮށް، އަދި އެންމެ ޝައުގުވެރިވާ ދާއިރާއަކަށް ގެންގޮސްދޭނެ ނިންމުމެއްކަން އެދުވަހު އޭނާހިތަކަށް ނާރައެވެ.
ކުދިކުދި ސުވާލުތަކުން ފެށި މި ދަތުރު، މަޑުމަޑުން ޝައުޤުވެރިކަމަކަށް ބަދަލުވަމުން ދިޔައެވެ. ބަނދަރުގެ މަސައްކަތްތައްދަސްކޮށް، އުޅަނދުފަހަރު މެނޭޖްކުރުމުގެ މުހިންމުކަން ދެނެގަނެ، އަދި ގައުމަށް ދެވޭ ބަނދަރުގެ ހިދުމަތްތަކުގެ މުހިންމުކަންއޭނާއަށް އިހުސާސްވުމާއެކު، އޭނާ ދެކެމުން އައި ގޮތް ބަދަލުވާންފެށިއެވެ. ސާދަ އަހަރު ފަހުން، އޭނާ މިހާރު ހުރީމަސައްކަތްކުރަމުންދާ ޔުނިޓްގެ އެންމެ އިސް އޮފިޝަލްގެ މަގާމުގައެވެ. މި މަގާމު އޭނާއަށް ލިބިފައިވަނީ ނަސީބަކުން ނޫނެވެ. އެއީއިހުލާސްތެރިކަމާއެކު ކުރި މަސައްކަތުގެ ނަތީޖާއެވެ.
އޭނާގެ ލީޑަރޝިޕް ބައްޓަންކުރުމުގައި އެހީވި މީހުން
ޖިޔާމް ގަބޫލުކުރާ ގޮތުގައި އެކަކަށްވެސް އެކަނި ކާމިޔާބެއް ނުލިބޭނެއެވެ. އަދި އެމްޕީއެލްގައި އޭނާ ކުރިއަރައި ދިޔުމަކީ އޭނާއަށްމަގުދައްކައިދިން މީހުންނާ ވަކިކުރެވޭނެ ކަމެއް ނޫނެވެ. އޭނާގެ ކެރިއަރުގައި، އޭނާގެ ގާބިލުކަން ދެކެ، އޭނާއަށް ބޭނުންވާހިތްވަރާއި މަގުދައްކައިދިން މެންޓަރުންނާއި އެކުވެރިން އޭނާގެ ވަށައިގެން ތިއްބެވެ. އެބޭފުޅުންގެ އިރުޝާދުތަކުގެ ސަބަބުންއޭނާގެ ނިންމުންތައް ވަރުގަދަވެ، ބަނދަރުގެ ކޮމްޕްލެކްސިޓީތައް ދެނެގަތުމުގެ ގާބިލުކަން އިތުރުވެ، އަދި ފަހުން އޭނާފެށުންގޮތަށް ވަން ޔުނިޓްގެ ލީޑަރަކަށްވުމަށް ތައްޔާރުވިއެވެ.
އެގޮތުން، ނޯތު ހާބަރު އޮޕަރޭޝަންސް ޓީމުގެ އިތުރުން، ކުރީގެ އެޗް.އޯ.ޑީ ހަމްދުއްﷲ ރަޝީދާއި، މިހާރުގެ ސެކްޝަން މެނޭޖަރ އަޒާ ފަދަ އިސްވެރިންގެ އިރުޝާދު އޭނާއަށް ލިބިގެންދިޔައެވެ. އޮޕަރޭޝަންސްގެ އޯވަރއޯލް އިންޗާޖް މުހައްމަދު ރީހާން، އެޑްމިން ޔުނިޓް ހެޑް މަރިޔަމް ފަރީޝާ، މެއިޓެނެންސް ޔުނިޓް ހެޑް ޝަމީމް އަދި މިހާރުގެ އެޗް.އޯ.ޑީ އަހުމަދު އިބްރާހިމް (ޝާޑް) ގެ އެއްބާރުލުން ވެސް އޭނާ ފާހަގަކުރެއެވެ. މި ހުރިހާ ފަރާތްތަކަކީ ވެސް ޖިޔާމްގެ ކާމިޔާބީގެ ފަހަތުގައިވާ މުހިންމު ބައިވެރިންކަމުގައި އޭނާ ގަބޫލުކުރެއެވެ.
އޭނާ ހަނދާންކުރާ ގޮތުގައި އެބޭފުޅުން ދިން ހިތްވަރުގެ ސަބަބުން އޭނާ ކުރިއަރައި ދިޔައީ ހަމައެކަނި މަސައްކަތުގެ ގޮތުންނޫނެވެ، އޭނާގެ އަމިއްލަ ދިރިއުޅުމުގައިވެސް ކުރިއެރުން ލިބުނެވެ. ައެބޭފުޅުންގެ އިތުބާރާއި، ނަސޭހަތާއި، އެއްބާރުލުމުގެސަބަބުން އޭނާއަށް މަސައްކަތުގެ މާހައުލުގައި ދިމާވި ގޮންޖެހުންތައް ހައްލުކޮށް، އޭނާގެ ލީޑަރޝިޕް ސްޓައިލްރަނގަޅުކުރެވުނެވެ. އޭނާ ގަބޫލުކުރާ ގޮތުގައި ނޯތް ހާބަރ އޮޕަރޭޝަންސްގެ ކާމިޔާބީތަކަކީ އެކަކުގެ މަސައްކަތުގެ ނަތީޖާއެއް ނޫނެވެ، އެއީ އެންމެންގެ އެއްބާރުލުމުގެ ނަތީޖާއެވެ.
ހާޒިރުވުމާއި، ތަރުތީބާއި، އަމަލީ ތަޖުރިބާގެ މައްޗަށް ބިނާވެފައިވާ ލީޑަރޝިޕް
ޖިޔާމްގެ ލީޑަރޝިޕްގެ އެއް ސިފައަކީ އޭނާގެ ހާޒިރުވުމެވެ. އޭނާ ގަބޫލުކުރާ ގޮތުގައި އޮޕަރޭޝަންސް ލީޑަރަކު މަސައްކަތް ބަލައި،މާހައުލް އިހުސާސްކޮށް، އަދި މައްސަލަތައް އަމިއްލައަށް ދެނެގަންނަން ޖެހެއެވެ. ކޮންމެ ހެނދުނެއްގައިވެސް އޭނާ ފަށަނީއީމެއިލްތައް ބަލައި، އޭނާގެ މަސައްކަތްތައް ރާވައިގެންނެވެ. އެއަށްފަހު އޭނާ ބަނދަރަށް ނިކުމެ، އެ ސަރަހައްދުގައިހިނގާބަލައި، އުޅަނދުފަހަރު ހުރި ގޮތް ބަލައި، ތޮއްޖެހޭ ތަންތަން ބަލައި، އަދި އޭނާގެ ޓީމާ ސީދާ ވާހަކަދައްކައެވެ. މިއީ އޭނާގެދިރިއުޅުމުގެ ބައެއްގެ ގޮތުގައި ވެފައިވާ އާދައެކެވެ.
އެކްޓިވް ބަނދަރެއް ބެލެހެއްޓުމުގައި އޭނާގެ ބޮލުގައި އެޅިފައިވާ ޒިންމާގެ ބަރުދަން އޭނާއަށް އެނގެއެވެ. ކޮންމެ ލަސްވުމަކާއި،ކޮންމެ މުއާމަލާތުގެ ދަތިކަމަކާއި، ކޮންމެ އޮޕަރޭޝަނަލް ހުރަހަކުން ސަރަހައްދުގެ ދިރިއުޅުމާއި ވިޔަފާރިތަކަށް އަސަރުކުރާނެ ގޮތްއޭނާއަށް އެނގެއެވެ. އެންމެ ދިގުދެމިގެންދާ ގޮންޖެހުމަކީ އަބަދުވެސް ފަޅުގެ ޖާގަ ކުޑަވުމެވެ. މިއީ ހަމައެކަނި މަސައްކަތުންހައްލުކުރެވޭނެ ދަތިކަމެއް ނޫނެވެ. އެހެންނަމަވެސް، އޭނާ އަދިވެސް އުންމީދުކުރަނީ، މުސްތަގްބަލުގައި އިތުރު ޖާގައާއި،ކުރިއަރާފައިވާ ބަނދަރެއްގެ ސަބަބުން މަސައްކަތްތައް ފަސޭހަކަމާއެކު ހަރުދަނާކަމާއެކު ކުރިއަށް ގެންދެވޭނެ ކަމަށެވެ.
އީމާންތެރިކަމުގެ މައްޗަށް ބިނާވެފައިވާ ބިންގަލެއް
އޭނާގެ މަސައްކަތުގެ ގާބިލުކަމުގެ އިތުރުން، ކޮންމެ ގޮންޖެހުމެއްގައިވެސް އޭނާއަށް މަގުދައްކާ ހިމޭން ބާރެއްވެއެވެ. އެ ބާރަކީނަމާދުން ލިބޭ ބާރެއްކަމަށް އޭނާ ބުންޏެވެ. ކޮންމެ ދަތިކަމެއްގައިވެސް، އެއީ އަމިއްލަ ކަމެއްކަމުގައިވިޔަސް ނުވަތަ މަސައްކަތުގެކަމެއްކަމުގައިވިޔަސް، އޭނާ ހިތްހަމަޖެހުން ހޯދުމަށްޓަކައި ކެތްތެރިކަމާއިއެކު ނަމާދަށް ރުޖޫއަވެއެވެ. އޭނާގެ ދިރިއުޅުމުގެބިންގަލަކީ ސޫރަތުލް ބަޤަރާގެ 153 ވަނަ އާޔަތެވެ:
“އޭ އީމާންވެއްޖެ ބަޔާއެވެ! ތިޔަބައިމީހުން ކެތްތެރިކަމާއި ނަމާދުން ވާގިހޯދާށެވެ! ހަމަކަށަވަރުން، ﷲ ވޮޑިގެންވަނީކެތްތެރިންނާ އެކުގައެވެ.”
ޖިޔާމްއަށްޓަކައި، މި އާޔަތަކީ ހަމައެކަނި ކިޔަވާލާ އެއްޗެއް ނޫނެވެ. އެއީ އޭނާ ދިރިއުޅުމުގައި ގެންގުޅޭ އަސާސެކެވެ. ނަމާދުންއޭނާއަށް މަގުދައްކައެވެ. ކެތްތެރިކަމުން އޭނާއަށް ދެމިހުރުމުގެ ބާރު ލިބެއެވެ. މި ދެކަންތައް ގުޅިގެން، އޭނާ ަހަމަޖެހޭ، ސާބިތު،އަދި މަސްއޫލިއްޔަތު އަދާކުރާ ލީޑަރަކަށް އޭނާ ބަދަލުކޮށްފައިވެއެވެ.
ދާއިމީ އަސަރުކުރާ ވަގުތުތައް
ކޮންމެ ދިގު ކެރިއަރެއްގައިވެސް މީހެއްގެ ހިތުގައި ދާއިމަށް ހަރުލާނެ ހަނދާންތަކެއް ހުރެއެވެ. ޖިޔާމްއަށްޓަކައި، އެފަދަ އެއްވަގުތަކީ މަސްބޯޓެއް ނޯތު ހާބަރުގެ ކަނޑުގެ ސަރަޙައްދުގެ މަނާ ސަރަޙައްދަކަށް ގާތްކުރި ވަގުތެވެ. އެއީ ބޯޓުގެ ކެޕްޓަނާއިފަޅުވެރިންނާ ދެގަޑިއިރަށްވުރެ ގިނައިރު ކެތްތެރިކަމާއެކު ވާހަކަދައްކަން ޖެހުނު ދަތި ހާލަތެކެވެ. ދެމިހުރުމާއި ހަމަޖެހޭމަޝްވަރާއަކުން، އެކަން ހަމަޖެހުމާއެކު ޙައްލުކުރެވުނެވެ. އޭނާ މިކަމުގެ ޝަރަފު ދެނީ ހަމައެކަނި އޭނާގެ އަމިއްލަ ގޮތްތަކަކަށްނޫނެވެ، އެކަމަކު އޭނާއާއެކު މަސައްކަތްކުރި ސެކިއުރިޓީ އަދި އޮޕަރޭޝަންސް ޓީމްތަކުގެ ވަރުގަދަ އެއްބާރުލުމަށެވެ. އޭނާބުނިގޮތުގައި، މިފަދަ ވަގުތުތަކުން އޭނާއަށް ހަނދާންކޮށްދެނީ ބަނދަރުގެ މަސައްކަތުގެ އަސާސަކީ ހަމައެކަނި ޓެކްނިކަލްކަމެއް ނޫންކަމެވެ. އެއީ އިންސާނީ ކަމެކެވެ. އެކަމަށް މުއާމަލާތްކުރުމާއި، އިހުސާސްކުރުމާއި، ސާބިތުކަމާއި، ޑިޕްލޮމެސީބޭނުންވާކަމެކެވެ. މި ތަޖުރިބާތަކުގެ ސަބަބުން އޭނާއަށް ބާރާއި އޯގާތެރިކަމާއެކު ލީޑްކުރުމުގެ ގާބިލުކަން ލިބިފައިވެއެވެ.
ނަމަވެސް، މި ހުރިހާ ހަނދާންތަކުގެ ތެރެއިން އޭނާ އެންމެ އަގުކުރާ ކާމިޔާބީއަކީ ނޯތު ހާބަރު އޮޕަރޭޝަންސް ޓީމަށް ލީޑަރުކަންދިނުމުގެ ފުރުސަތު ލިބުމެވެ. އޭނާގެ ޓީމަކީ ހިތްވަރުގަދަ، ކަމަށް ކަމޭހިތާ، އަދި ވަރަށް އެއްބާރުލުންދޭ ބައެއްކަމަށް އޭނާ ދެކެއެވެ. އެމީހުންގެ ބުރަ މަސައްކަތުން އަދި އެއްބައިވަންތަކަމަކީ ބަނދަރުގެ ކާމިޔާބީގެ އެއް މުހިންމު ސަބަބުކަމަށް އޭނާ ދެކެއެވެ.
ކެރިއަރުގައި އިހުތިޔާރުކުރި މަގު
އެމްޕީއެލްއާ ގުޅުމުގެ ކުރިން، ޖިޔާމް ހީކުރީ އޭނާ ވަރަށް ތަފާތު ކެރިއަރެއްގައި މަސައްކަތްކުރާނެކަމަށެވެ. އޭނާގެ އޭ–ލެވެލްނިންމުމަށްފަހު، އޭނާ ރާވާފައި އޮތީ ސިވިލް އިންޖިނިއަރިންގ ދާއިރާއިން ކުރިއަށް ދިއުމަށެވެ. ފަހުން، ނޯތު ހާބަރުގައިމަސައްކަތްކުރަމުން ދަނިކޮށް، އޭނާ ޤާނޫނީ ދާއިރާއަށް ބަދަލުވުމަށްވެސް ވިސްނިއެވެ. ނަމަވެސް ދިރިއުޅުމުގައި އޭނާއަށްޓަކައިއޮތީ އެހެން މަގެކެވެ. އެ މަގު އޭނާ ފަހުން ހިތުގެ ފުންމިނުން ގަބޫލުކުރިއެވެ.
މިއަދު، އޭނާއަށް އެހެން ތަނެއްގައި ހުރެވޭނެކަމަކަށް ހިޔާލެއް ނުކުރެވެއެވެ. ބަނދަރު ވަނީ އޭނާގެ ދިރިއުޅުމުގެ ބައެއްކަމަށްވެފައެވެ. އަދި އޮޕަރޭޝަންސްގެ މާހައުލަށް އޭނާއަށް ވަރަށް ބޮޑު ގުޅުމެއް އިހުސާސްކުރެވެއެވެ. އޭނާގެ މިހާރުގެ ލަނޑުދަނޑިތައްބިނާވެފައިވަނީ އެމްޕީއެލްގެ މުސްތަގުބަލަށް އެހީތެރިވުމާއި، ނޯތު ހާބަރުގެ ހިދުމަތްތައް ވަރުގަދަކުރުމާއި، ގައުމުގެ އިޤްތިޞާދީކުރިއެރުމަށް އެހީތެރިވާނެ ބަނދަރު ނިޒާމެއް ބިނާކުރުމަށެވެ.
އެމްޕީއެލްއާއި ނޯތު ހާބަރުގެ މުސްތަގުބަލަށް އޮތް ތަޞައްވުރު
މޯލްޑިވްސް ޕޯޓްސް ލިމިޓެޑްއިން 40 ވަނަ އަހަރަށް ފިޔަވަޅު އަޅާއިރު، ޖިޔާމް ވިސްނާލަނީ މި ކުންފުންޏަށް އަންނަންހުރި ބޮޑެތި ބަދަލުތަކެވެ. އެމްޕީއެލް ތައްޔާރުވަމުން މިދަނީ ޒަމާނީކުރުމާއި އާ އިންފްރާސްޓްރަކްޗަރގެ މައްޗަށް ބިނާވެފައިވާމުސްތަގުބަލަކަށެވެ. އަދި އޭނާގެ ހުވަފެނަކީ ޓެކްނޮލޮޖީއާއި ގާބިލުކަން ލިބިފައިވާ ޒަމާނީ ބަނދަރެއް ފެނުމެވެ.
ހާއްސަކޮށް ނޯތު ހާބަރަށް ބަލާއިރު، އޭނާ އުންމީދުކުރަނީ ތަރައްޤީގެ މަޝްރޫޢުތައް ނިމި، އެ ތަން ޢާންމުންނަށް އިތުރަށްފަސޭހަވެ، އެކަށީގެންވާ ގޮތަކަށް މަސައްކަތްކުރާނެ ދުވަހަކަށެވެ. މި ބަދަލުތަކުގެ ސަބަބުން ވިޔަފާރިވެރިންނާއި،މަސްވެރިންނާއި، އަދި ފުޅާ ދާއިރާއެއްގައި މުޖުތަމަައަށް ބޮޑެތި ފައިދާތަކެއް ލިބޭނެކަމަށް އޭނާ ގަބޫލުކުރެއެވެ.
ޒުވާނުންނަށް އުންމީދާއި ހިތްވަރުގެ މެސެޖެއް
މި ދާއިރާއިން ކުރިއަރަން ބޭނުންވާ ޒުވާނުންނަށް ދޭނެ ނަސޭހަތަކާ ބެހޭގޮތުން ސުވާލުކުރުމުން، ޖިޔާމް ދެނީ ހިތްހަމަޖެހޭއަދި ސާދާ އިރުޝާދެކެވެ. މަގު ނޭނގޭ ކަމުގައިވިޔަސް، ހިތްވަރާއެކު ކުރިއަށް ދިއުމަށް އޭނާ އެމީހުންނަށް ބާރުއަޅައެވެ. އުންމީދުކަނޑާނުލުމަށް އޭނާ ހަނދާންކޮށްދެއެވެ. އޭނާ ބާރުއަޅަނީ ދާއިމަށް ދަސްކުރުމާއި، އަމަލީ ތަޖުރިބާ ހޯދުމާއި، އަދި ދާއިރާގެކުރިއެރުންތަކާ ބެހޭގޮތުން މައުލޫމާތު ހޯދުމުގެ މުހިންމުކަމަށެވެ.
