މާލޭގެ މަގުތަކަކީ އަމާން ރައްކާތެރި މަގުތަކަކަށް ހެދުމަށް ފުލުހުން ކުރަމުންދާ މަސައްކަތުގެ ދަށުން، މިދިޔަ މަހު ގާތްގަނޑަކަށް ފަސް މިލިއަން ރުފިޔާގެ މުދާ ރިކަވާކުރެވުނުކަމަށް ފުލުހުން ބުނެފިއެވެ.
މިދިޔަ އޮގަސްޓް މަހުގެ 1 އިން 31 އަށް މާލެ ޕޮލިސް ކޮމާންޑުގެ ޑިޕާޓްމަންޓްތަކުން ކޮށްފައިވާ މަސައްކަތްތަކުގެ ތަފާސްހިސާބުތައް ފުލުހުން ވަނީ އާންމުކޮށްފައެވެ.
ތަފާސްހިސާބުތަކުން ދައްކާގޮތުން، މިިދިޔަ މަހު މާލޭ ފްރަންޓްލައިން ޕޮލިސިންގ އިން 90 ސައިކަލު ރިކަވަރ ކޮށްފައިވެއެވެ. މީގެއިތުރުން 19 މޯބައިލް ފޯނާއި، ތަފާތު 40 މައްސަލައެއްްގައި ގެއްލުނު ފައިސާވެސް ހޯދާފައި ވެއެވެ. މިތަކެތީގެ ޖުމްލަ އަގު ގާތްގަނޑަކަށް ފަސް މިލިއަނަށް އަރައެވެ.
ފުލުހުން ރިކަވާކުރި މުދަލާއި، އެތަކެތީގެ އަގު:
- 90 ސައިކަލު: 4،285،880 ރުފިޔާ
- 19 މޯބައިލް ފޯނު:219،843 ރުފިޔާ
- 4 އިލެކްޓްރޯނިކްސް: 19،850 ރުފިޔާ
- 47 އެހެނިހެން ތަކެތި: 80،848 ރުފިޔާ
- ގެއްލުނު ފައިސާ: 329،350 ރުފިޔާ
ތަފާސްހިސާބުތަކުން ދައްކާގޮތުން، މިިދިޔަ މަހު މާލޭ މަގުމަތިން ޖުމްލަ 5،581 މީހަކު ހުއްޓުވައި ބަލައި ފާސްކޮށްފައިވެއެވެ. އޭގެތެރެއިން 5،373 މީހުންގެ ކުށުގެ ރެކޯޑު އޮވެއެވެ. ކުށުގެ ރެކޯޑު ނެތީ އެންމެ 208 މީހެއްގެއެވެ.
މީގެއިތުރުން ބިދޭސީންނާ ގުޅުންހުރި މަސައްކަތްތަކުގެ ތެރެއިން 4 ބިދޭސީއެއް ބަލައި ފާސްކޮށް އިމިގްރޭޝަނާ ހަވާލުކޮށްފައި ވެއެވެ.
ތަފާސްހިސާބުތައް ދައްކާގޮތުން، ރައްޔިތުންގެ ކަންބޮޑުވުންތައް ހައްލުކުރުމަށް އަވައްޓެރި ފުލުހުން ވަނީ ޖުމްލަ 900 ކޮމިއުނިޓީ އިންޓަރެކްޝަނެއް ބާއްވާފައެވެ. އަދި 102 މައްސަލައެއް ހައްލުކުރުމަށް މަސައްކަތްކޮށްފައިވާއިރު، ކުށަކަށް ނުވާ 54 ކަންބޮޑުވުމެއް ރައްޔިތުން ހުށައަޅާފައިވެއެވެ. އަދި ކުށަކަށްވާ 35 ކަންބޮޑުވުމެއް ރައްޔިތުން ހުށައާޅާފައިވެއެވެ.
